Шу кунларда давлат органлари ва ташкилотлари меҳнат жамоаларида “Конституция — халқчил давлат, барқарор тараққиёт ва фаровон ҳаёт асоси!” деган бош ғояни ўзида мужассам этган тадбирлар ташкил этилиши давом этмоқда.
Пойтахтимиздаги Миллий гвардия Маънавият ва маърифат марказида Юридик таъминлаш ва мурожаатлар билан ишлаш бошқармаси мутахассислари томонидан ҳарбий хизматчилар ва ходимлар ҳамда ишчи хизматчилар учун Янги таҳрирдаги Ўзбекистон Республикаси Конституцияси ва “Ўзбекистон — 2030” стратегияси ҳақида ўқув машғулоти ўтказилди.
Ўқув машғулотида 2023 йил 30 апрель куни халқимиз томонидан қабул қилинган Янги таҳрирдаги Конституцияси барча соҳалардаги ислоҳотларнинг сиёсий-ҳуқуқий асослари, давлат ва жамиятни янада ривожлантиришнинг устувор йўналишлари белгилаб берилганлиги қайд этилди. Шунингдек, конституциявий ислоҳотларнинг бош тамойили ҳисобланган “суверен, демократик, ҳуқуқий, ижтимоий ва дунёвий давлат” тушунчалари, “Конституция — халқчил давлат, барқарор тараққиёт ва фаровон ҳаёт асоси!” деган ҳаётий шиорнинг мазмун–моҳияти, инсон ҳуқуқ ва эркинликлари қўшимча кафолатлар, янги киритилган 27 та янги модданинг – шахс, жамият ва давлат манфаатлари учун амалий аҳамияти, Давлат раҳбари, Парламент ва Ҳукумат қарорлари асосида Янги таҳрирдаги Конституцияни амалга ошириш бўйича чора-тадбирлар ҳақида маълумот берилди.
Қайд этилишича, Янгиланган Конституция қабул қилиниши муносабати билан Давлат раҳбарининг 14 та, Вазирлар Маҳкамасининг 10 та қарорига ўзгартириш ва қўшимчалар киритилган. Шунингдек одил судловни амалга оширишда конституциявий нормаларни тўғридан-тўғри қўллаш бўйича Олий суди пленумининг қарорлари қабул қилинган. Олий Мажлис Палаталари томонидан тасдиқланган “Қонунчиликни янги таҳрирдаги Ўзбекистон Республикаси Конституциясига мувофиқлаштириш бўйича чора-тадбирлар дастури” асосида 30 та йўналишда қонунлар ва кодексларга ўзгартириш киритиш ёки янги таҳрирда қабул қилиш бўйича норма ижодкорлиги фаолияти давом этмоқда.
Шунингдек, тадбирда нотиқлар томонидан конституциявий-ҳуқуқий шароитларда мамлакатимиз тараққиётининг асосий йўналишларини такомиллаштириш ва амалга оширилаётган кенг кўламли ислоҳотларни янги босқичга олиб чиқиш мақсадида Давлат раҳбари томонидан тасдиқланган “Ўзбекистон — 2030” стратегиясининг мазмун-моҳияти, шу жумладан эркин, фаровон ва қудратли Янги Ўзбекистонни барпо этиш йўлидаги концептуал аҳамияти очиб берилди.
“Ўзбекистон — 2030” стратегиясининг ҳар бир инсонга ўз салоҳиятини рўёбга чиқариш учун муносиб шароитлар яратиш, барқарор иқтисодий ўсиш орқали аҳоли фаровонлигини таъминлаш, сув ресурсларини тежаш ва атроф-муҳитни муҳофаза қилиш, қонун устуворлигини таъминлаш, халқ хизматидаги давлат бошқарувини ташкил этиш, “хавфсиз ва тинчликсевар давлат” тамойилига асосланган сиёсатни изчил давом эттириш каби 5 та устувор йўналишидаги вазифалар бўйича тўхталди.
Ўқув машғулоти иштирокчиларига, мулкий ҳуқуқларни таъминлаш, соғлиқни сақлаш, илм-фан, маданият, санъат ва спорт соҳаларини ривожлантириш, нуронийлар, хотин-қизлар ва ёшларга ғамхўрлик кўрсатиш, оила, оналик, болалик ва оталикни ҳимоя қилиш йўналишларидаги ишлар натижалари ҳақида маълумот берилди.
Миллий гвардия тизимида Янгиланган Конституция бўйича ташкилий ва маърифий тадбирлар давом этмоқда.