Миллий гвардия Маънавият ва маърифат марказида 15-май Халқаро оила куни муносабати билан, шу билан бирга, «Мустаҳкам оила – жамият таянчи» каби концептуал ғоялар негизида «Янги Ўзбекистоннинг ибратли ҳарбийлар оиласи» номли кўрик-танловининг республика босқичи ўтказилди.
Мазкур кўрик-танловда ҳарбий қисм ва муассасалар шахсий таркиби орасида ҳурмат қозонган, жамиятда инсонлар билан яхши муносабат ўрнатиб, фарзанд тарбияси масаласида ўрнак кўрсатган ҳамда ҳар томонлама ибратли ҳарбий оила бўла олган ҳарбий хизматчиларнинг оилалари иштирок этишди.
Кўрик-танловнинг республика босқичида камида ўн йиллик оилавий ҳаёт тажрибасига эга бўлган, ҳудудий танлов ғолиблари ўз кучларини синашди.
Иштирокчиларни баҳолаш учун ҳамкор ташкилот, жамғарма ҳамда муассасалар вакилларидан иборат ҳакамлар ҳайъати йиғилиб, оилаларни таништирув, саҳна кўриниши ва миллий анъаналар, шунингдек, урф-одатларни кўргазмали намойиш этиш шартлари бўйича қилган тайёргарликларини шаффоф тарзда баҳолаб борди.
Якуний натижалар аниқлангандан сўнг, танловнинг тантанали тақдирлаш маросими ўтказилди.
Унда Миллий гвардия қўмондонлиги, ҳамкор ташкилот вакиллари иштирок этиб, ғолиблар эълон қилинди. Унга кўра, 3-ўринга Бухоро вилояти бошқармаси ҳарбий хизматчиси Ачиловлар оиласи муносиб деб топилган бўлса, 2-ўрин Миллий гвардия Тошкент вилояти Қибрай туманидаги ҳарбий қисм номидан иштирок этган Йўлдошевлар оиласига насиб этди, фахрли 1-ўрин бўлса, Миллий гвардия Жиззах вилояти бўйича бошқармаси ҳарбий хизматчиси Дўсмоновлар оиласига насиб этди.
Ғолиблар диплом ва қимматбаҳо эсдалик совғалари билан тантанали тақдирланди.
Бундан ташқари танлов иштирокчилари турли номинациялар бўйича ҳам рағбатлантирилди.
Якунда Миллий гвардия Маънавият ва маърифат маркази ашула ва рақс ансамбли хонандалари томонидан концерт дастури тақдим этилиб, барчага янада кўтаринки кайфият улашди.
Бундай танловларни ўтказилишидан кўзланадиган асосий мақсад Миллий гвардия ҳарбий хизматчилари ва уларнинг оила аъзолари онгида тарихимиз, миллий анъаналаримиз ва урф-одатларимизга чуқур ҳурмат ва эҳтиромни юксалтириш, ижодий ташаббускорликларини шакллантириб, улар орасида соғлом рақобат муҳитини қарор топтириш, соғлом турмуш тарзини тарғиб этиш, оила институтини янада мустаҳкамлаш, амалга оширилган соҳага оид ишларни янги марраларга кўтаришдан иборат.