Урганч шаҳридаги олимпия ва паралимпия спорт турларига тайёрлаш марказида Миллий гвардия Хоразм вилояти «Қўриқлаш» бошқармаси ташаббуси билан спортнинг “Камондан отиш” тури бўйича заиф эшитувчи болалар ўртасида мусобақа ўтказилди.  

Бу тадбир, спортнинг паралимпия йўналишларини ривожлантириш ва камондан отиш каби миллий спорт турларига қизиқишни оширишда муҳим қадам бўлиб, ўқувчиларнинг жисмоний ҳолатини яхшилашга катта ҳисса қўшади.

Республикамиз бўйлаб камондан отиш турини оммалаштириш ва ёшларни спортга жалб қилиш борасида бир қанча мусобақалар ва махорат дарслари ташкил этилмоқда. Бу тадбирлар, энг аввало, спортнинг ушбу тури бўйича иқтидорли ёшларни аниқлаш ва уларни олимпия ўйинлари каби катта миқёсдаги мусобақаларга тайёрлаш учун катта аҳамиятга эга.

Урганч шаҳрида ўтказилган мусобақада эса, алоҳида таълим олувчи заиф эшитувчи болалар учун ихтисослаштирилган мактаб интернати ўқувчилари иштирок этишди. 

Ўтказилган тадбир натижаларига кўра ғолиб бўлган иштирокчилар ҳамда фаол қатнашган ёшлар Қўриқлаш бошқармаси бошлиғининг диплом, медаль ҳамда эсдалик совғалари билан тақдирландилар.