Бугунги кунда таълим тизимини хусусан, олий таълим тизимини такомиллаштириш ва замон билан ҳамнафас тарзда ривожлантириб бориш давлатимизнинг бош ислоҳотига айланган.

Ушбу ислоҳотлар доирасида 2024 йил 4 октябрь санасида Ўзбекистон Республикаси Миллий гвардияси Фарғона минтақавий ўқув марказида Республикамизнинг бир қатор етакчи олий таълим муассасалари ва Фарғона вилояти хокимлиги ҳузуридаги рақамли технологиялар марказининг мутасадди ходимлари иштирокида "Илм-фан ва таълимнинг инновацион ривожланиши: ҳозирги ҳолати ва тараққиёт тамойиллари" мавзусида илмий-амалий анжуман ўтказилди.

Сўзга чиққанлар томонидан анжуманнинг мақсад ва вазифаларига тўхталиб, мамлакатимиз илм-фани олдида турган устувор йўналишлар, ҳозирги глобаллашув даврида инновацион ривожланиш тенденцияларини амалиётга татбиқ этиш масалалари, бу борада миллий ва халқаро тажрибанинг ўзига хос жиҳатларига эътибор қаратди.