Жамоат хавфсизлиги Университетида бокс бўйича икки карра олимпиада чемпионлари иштирокида “Чемпионлар ва ёшлар учрашуви” ўтказилди
Хабарингиз бор, Париж-2024 ХХХИИИ ёзги Олимпия ўйинларида Ўзбекистон шарафини ҳимоя қилган спортчиларимиз томонидан жуда кўплаб тарихий натижалар қайд этилди.
Хусусан, бокс бўйича икки карра Олимпиада ғолиби, жаҳон, Осиё ва бир неча бор Ўзбекистон чемпиони, Миллий гвардия ҳарбий хизматчилари Баҳодир Жалолов ҳамда Хасанбой Дўстматовларнинг иштироки ва ғалабаси барчада фахр-ифтихор туйғусини уйғотди.
Миллий гвардия қўмондонлиги ташаббуси билан ташкил этилган тадбирда ҳам Жамоат хавфсизлиги университети курсантлари ушбу спорт усталари билан яқиндан танишиш ва бевосита суҳбатлашиш имкониятига эга бўлишди.
Тадбирга ташриф буюрган меҳмонлар Оркестр садолари остида тантанали кутиб олинди. Дастлаб чемпионлар Университет спорт мажмуасига ташриф буюриб, у ерда курсантларнинг спорт билан шуғулланишлари учун яратилган шароитлар билан яқиндан танишишди, шунингдек, ёш спортчилар билан амалий машғулотлар ўтказишди.
Шундан сўнг, Университет Маънавият ва маърифат маркази тадбирлар залида спортчилар ва курсантлар ҳамда талабалар иштирокида давра суҳбати ўтказилди. Унда ёшлар томонидан асосан спортчиларнинг Париж ёзги олимпиада ўйинлари иштирокига оид маълумотларга кўпроқ қизиқиш билдирилди.
Тадбир очиқ мулоқот тарзида ўтказилиб, қизиқарли савол- жавобларга бой бўлди, ўз ўрнида чемпионлар иштирокчиларнинг барча саволларига самимийлик билан жавоб қайтаришди.
Шу билан бирга, тажрибали спортчилар Университетда яратилган бу каби шароитларга фақатгина яхши билим ҳамда спортдаги улкан натижалар билан жавоб қайтариш кераклиги ҳақида ёшларга ўзларининг керакли тавсияларини бериб ўтишди.
Маросим сўнгида Университет ҳарбий хизматчиси бошчилигидаги курсантлар таркибидан иборат ижодий гуруҳ томонидан ижро этилган куй-қўшиқлар даврага ўзгача файз бағишлади